رساله شهيد

بسم الله الرحمن الرحيم


انا يا امى الشهيد

قتلتنى ميت ايد وايد

ايد خونه عايشه فى بلدى

متعاسه بدم الشهيد

لقو الميه مش كافيه

رشونا بالرصاص

وبالجمال والخيول

يا امى علينا انداس

عشان الحق يموت

ولا ينرفعله راس


انا يا امى الشهيد

فى شرع مين

يموت صوت الحق

وتتهرب مساجين

عشان قلنا لا

فى شرع مين

تتحبس الحريه

ويتقال علينا تافهين

وشويه بلطجيه

فى شرع مين اموت

على ايد اخ ليا

ويموت راجل بسيط

كان عاوز لقمه هنيه


انا يا امى الشهيد

قولى ابنى شهيد

قولى مات بطل

دافع عن كرامته

و كرامه الوطن

قولى صنع تاريخ

المجد والشرف

وكتب بدمه نهايه

الظلم والقرف

متبكيش يا امى

فى الجنه مستنيكى

مشتاق ابوس ايدك

وامسح دمعه عنيكى

متبكيش عليا يا امى

ده موتى فخر ليكى


انا يا امى الشهيد

وهيا ديه رسالتى

رسالتى لابن وطنى

رسالتى لابن بلدى

يلا ابنى وكبر

وارمى زرع الخير وخضر


يلا اتعلم بجد

وخليك راجل وفكر

ليه روحنا فداك

عشان انتا تكبر

انا يا امى الشهيد