طقيه اخفا

تايهه منا يا بلد
فى مولد اسمه حبك
وحب اى ده يا بلد
الى يوطيكى ويهدك
ده احسن يكرهوكى ولادك
لو من مصلحتك كرهك
او كدبه بصوتى فدا بلادى
وانا همى مصلحتى مش مصلحتك
وطقيه اخفا لبساها
ومش شايفنلك ملامح
مين حاكمك ظالم ومين حاكمك صالح
وفى هنا احنا النهارده ؟
ولا منفرقش عن امبارح؟
يا مصرنا يا همنا يا اخره صبرنا
هو احنا مش ولادك
ولا ايه اصلنا؟
ده بالاماره واخدين صلابتك
حيرتينا ف امرنا
ثوره وهاصت
ودنيا باظت
وجبهه لئيمه
بنت لزينه
نطت نطه
وملت الشنطه
وهوب فركش
وكلام فى المشمش
ورجعت كوسه
وبنت عجوزه
رجعت بايره
لما انتخبو ابن الدايره
بورقه بميه
وناس حراميه
سرقو مكانى
عشان انانيه
وايه انا ليه
غير طعميه
ورغيف حاف
وسقعه تزيد
ولا لاقى لحاف
وارجع تانى اموت من الخوف
او برصاصه ويقولو ارهاب
او متاجر بسندوتش كباب
وارجع تانى لنفس الهباب
حياه قمعيه
لصوتى وعينيا
وانتى لابسه نفس الطقيه
طقيه اخفا
واحنا هنخفا
واحد واحد وادينا بنموت
ما هيا هيا
نفس العمليه
لما نعيش مكتومين الصوت